أُلفت عمر: الجمهور انتقد رانيا التومي في سره الباتع لأنها مستفزة وFake

علقت الفنانة أٌلفت عمر، على الانتقادات التي طالت مسلسلها سره الباتع، الذي عُرض في الموسم الرمضاني 2023، والتي طالت أيضًا الفنانة التونسية رانيا التومي.

وقالت أُلفت عمر في تصريحاتها لـ القاهرة 24: مش شايفة إن انتقاد شمس الكويتية كان فيه حاجة، والجمهور انتقد الـ Fake واللبس بتاع رانيا التومي، والحقيقة أنه كان مستفز لأنه فيك مش أصلي، ولو كان أصلي كنت هعديها لكن فيك جدًا.

ألفت عمر: صعوبات الشغلانة دمها تقيل
كما تحدثت ألفت عمر عن سبب تأخرها وقلة أعمالها الفنية، قائلة: كان الأول كسل مني وحياتي الشخصية كان فيها مشاكل كتير ولكن بقيت مركزة في شغلي، والدنيا كلها اتغيرت وشركات الإنتاج، وناس كتير قالوا عليا إني سافرت برا مصر ومش هرجع وناس قالوا إني سيبت الشغلانة خالص، وكان في مخرجين كتير طلبوني في الوقت ده وفكروا إني اعتزلت.. ولكن الحمد لله عملت صدى حلو ولكن علاقاتي وتواجدي في الوسط الفني مش زي الأول.

وأضافت ألفت عمر: حسيت إن اتأخر عليا فكرة الفرصة الحلوة يمكن من الضغوط بتاعت فترة الشغل والتصوير وغياب الأعمال كنت هشتغلها ومعبرتش عن حالتي النفسية بأي شكل من الأشكال، الصعوبات بتاعة الشغلانة دمها تقيل، خاصة ممكن نشوف حد بيقول هيعتزل عشان مفيش شغل وهو لسة عامل بطولة، والواحد لو فكر زي الناس دي كان زمانه ميت، ولكني الحمد لله بفكر بشكل إيجابي دلوقتي.

آخر أعمال ألفت عمر
ومن ناحية أخرى، خاضت الفنانة ألفت عمر الماراثون الرمضاني 2023 من خلال مشاركتها في مسلسل سره الباتع، وضم العمل كلًا من: الفنان أحمد فهمي، وأحمد السعدني، بجانب مشاركة مجموعة كبيرة من الفنانين بمصر والوطن العربي، وكان أبرزهم: خالد الصاوي، أحمد عبد العزيز، هالة صدقي، حنان مطاوع، هدى الإتربي، ميدو عادل، عمرو عبد الجليل، أحمد توفيق، صلاح عبد الله، رانيا التومي، والعمل من إخراج خالد يوسف.