شاهد بالصور أصدقاء أيمن بهجت قمر يحتفلون بحصوله على البكالوريوس

احتفل أصدقاء الشاعر والسيناريست أيمن بهجت قمر بحصوله على درجة البكالوريوس فى السياحة، بعد مشوار دراسى طويل، وأحضروا له "تورتة" للاحتفال بهذه المناسبة.

وقال المؤلف أيمن بهجت قمر تعليقا على حصوله على البكالوريوس فى السياحة: "كانت حاجة مهمة ومضايقانى وكنت حاسس إن فى حاجة ناقصاني".

وأضاف بهجت قمر، خلال تصريحات إعلامية: "والدى توفى وأنا فى تالتة إعدادي، ومن أولى ثانوى عيشت لوحدي، وكنت بصرف على نفسى وكان لازم أشتغل، وبقيت آخد السنة فى سنتين فى المعهد، والتالتة أنجح، ووصلت لسنة رابعة من 20 سنة، وكان عندى 3 مواد، وكنت محافظ على وجودى إنى طالب وكنت حريص إنه هتيجى لحظة وأخلص ده كله".

وتابع: "لما اتقدمت لمراتى من 17 سنة وعدت حمايا إنى هكمل، وبعتله رسالة لما خلصت امتحانات، وقلت له، أنا نفذت وعدى وخلصت امتحانات"، مردفا: "لما رحت اتفاجئت إنهم 4 مواد مش 3".

وأردف: "كنت بتكلم مع ابنى وأقوله ذاكر وكدة، قالى يا بابا أنت مش مخلص، قلت له أنا كان لازم أشتغل وأعتمد على نفسي، وخدت القرار السنادي، وقدمت، قابلت الدكتورة عزة مسعود عميدة المعهد، وكانوا فرحانين إنى رجعت، وعندى ولاد وعاوز أكمل، كان الموضوع ظريف ولطيف".