غادة إبراهيم: حاولت انتحر بعد وفاة والدي.. وكنت عايزة أهرب من البيت

روت الفنانة غادة ابراهيم تفاصيل معاناتها بعد وفاة والدها، بعدما كانت متعلقةً به نفسيًا، وقالت: مقدرتش بعد وفاة بابا وكنت عايزة أمشي وأهرب من البيت ووافقت بأول جوازة، وكنت عايشة مع أخويا وأختي وعندي أخوات من بابا؛ لأنه كان متجوز 3.

وتابعت غادة إبراهيم خلال تصريحات تلفزيونية: قطعت شراييني بعد وفاة والدي ومقدرتش، وابن عمي جري بيا على المستشفى، ده كفر ومش حاجة حلوة، بس أنا كنت صغيرة مش فاهمة وهانت عليّا نفسي.

وأضافت غادة: ماما حادة جدًا ومامتها كانت تركية، وكانت مدلعاني بس مش زي بابا، أنا كنت في حضن بابا ودلع وسفر وكل طلباتي أوامر، لكن ماما مش بتبين حنيتها وحنانها داخلي.

وأردفت: أول عربية ألماني كانت جيبهالي ماما وأنا في ثانوي وكانت طلب خاص ومدلعاني بس مش زي بابا، وأنا مقدرتش وكنت عايزة أهرب.

وأشارت غادة إبراهيم إلى أنها تكره صفة الكذب في الإنسان، وقالت: اللي بيكذب هيقتل وهيزني وهينصب وهيعمل كل حاجة.

مواصفات فتى أحلام غادة إبراهيم

وأوضحت غادة أنها تتمنى أن يكون فتى أحلامها به العديد من الصفات الجيدة ومنها: أن يكون شخص محترم وراجل وعنده نخوة، ويحبها من قلبه، ولا تكون به صفة البخل لأن البخل يقتلها، مضيفةً: أنا اتجوزت راجل مفلس وكبرته لحد ما بقى كيان، ووالدتي محضرتش كتب كتابي، وكانت عندها رؤية مستقبلية وياريتني سمعت كلامها.