هبة السيسي: فستاني بمهرجان القاهرة السينمائي فرعوني.. وأنا مظلومة واتاخدت في الرجلين

علقت الفنانة هبة السيسي، على الانتقادات التي تعرضت لها بسبب فستانها الجريء في حفل افتتاح مهرجان القاهرة السينمائي في دورته الـ 44، مؤكدة أنها لم تسع خلف التريند.

وقالت هبة السيسي: كل إنسان له ذوق مختلف وأنا بالنسبة لبعض الناس قدوة في لبسي وبيحبوه وكل واحد له استايل ومن حقه يلبس اللي عايزه في حدود القواعد، وأنا مظلومة واتاخدت في الرجلين وسط الهجوم ده، وفستاني استايل فرعوني.

كما أعربت هبة السيسي عن استيائها من منع الفنانة هند عاكف من دخول حفل افتتاح مهرجان القاهرة السينمائي، قائلة: مش عاجبني اللي حصل مع هند عاكف لأنها جت ومش مشكلة لو مش معاها دعوة، ومينفعش نوقف حد على الباب يطردها، وهي كانت لابسة شيك ومحترم وكانت متمسكة بحضور المهرجان، وهي مش جاية من الشارع دي فنانة ولها تاريخ.

وأضافت هبة السيسي: مش عاجبني منع البلوجر من حضور مهرجان القاهرة السينمائي؛ لأن جميع المهرجانات في العالم بيبعتوا دعوات لـ البلوجر لأنهم وجوه إعلامية ولهم فانز ومتابعين بالملايين ولازم نحترمهم.

واختتمت هبة السيسي حديثها، قائلة: أنا بنتظر مهرجان القاهرة السينمائي من السنة لـ السنة وبكون حريصة على حضور جميع الفعاليات مش الافتتاح والختام فقط، لأني بحب السينما زي ما بحب الموضة والمهرجان جمع بين الاتنين الموضة والأفلام، وأنا مفرحتش إني طلعت تريند زي ما ناس تانية بتعمل، بالعكس قواعد المهرجان والدريس كود لازم الكل يحترمها، وأنا مش قصدي أكسر القيود.