أمل رزق: قلت لبنتي ربنا يكسفك بعد دورها في جعفر العمدة.. ومحمد سامي معاه مفاتيح الممثلين

أعربت الفنانة أمل رزق عن سعادتها بنجاح ابنتها لمى كتكت في موسم دراما رمضان 2023، بمشاركتها في مسلسل جعفر العمدة مع الفنان محمد رمضان والمخرج محمد سامي.

وقالت أمل رزق خلال تصريحات : أنا بحب محمد رمضان بشكل شخصي وغلاوته زادت لما لمى بنتي نجحت معاه السنة دي في جعفر العمدة والنجاح مش أنا اللي بقوله ده مصر كلها بتتكلم عليه، بباركله من قلبي، وإن شاء الله فيلم هارلي يلاقي نفس النجاح بتاع جعفر العمدة.

وأردفت أمل رزق عن نجاح ابنتها في مسلسل جعفر العمدة: كنت بقولها ربنا يكسفك.. مبسوطة أوي لأن اللي عملته لمى كان مختلف تمامًا عن شخصيتها ده بالنسبة لها نجاح.. والناس في الشارع بقيت تقولها حاجات إيه يا أبو حاجات.. أنتي طماعة بتعملي كده ليه؟ حاجات إيه يا أبو حاجات.

لمى كتكت مع محمد رمضان من كواليس مسلسل جعفر العمدة

وأضافت: بقولها ربنا يوفقك وتبقى خطواتك ثابتة وتشتغلي مع فنانين ومخرجين جامدين.. كان ليا الحظ إني اشتغلت مع أستاذ محمد سامي في آدم وأهواك وكلام على ورق وعارفه كويس جدًا.. محمد سامي بيبقى معاه مفاتيح الممثلين ومفاتيح الشخصيات.. ولما حد يفتحله محمد سامي يا هناه ولمى منهم إن شاء الله.