حسي وسمعي وبصري.. ياسمين عز تكشف أنواع الرجال وطريقة التعامل معهم

كشفت الإعلامية ياسمين عز، أنواع الرجال وطريقة التعامل معهم، مشيرة إلى أن الرجل قد يكون بصري أو سمعي أو حسي.

وقالت ياسمين عز في برنامج كلام الناس عبر شاشة إم بي سي مصر: السمعي بيتأثر بالكلمة الحلوة والصوت الواطي ومش بيحب الزن، سمعيه أغنية أو كلام حلو وتلمي قرودك وولادك في البيت وتستخدمي سلطة جاهزة وبلاش خلاط، وبلاش سشوار وهو موجود وما تشغليش الغسالة وهو نايم وبلاش تشغلي المكنسة يوم الجمعة الصبح.

وأضافت ياسمين عز: الرجل البصري بيركز بالعينين، يعني ما تصحيش وشعرك الشمس المشرقة، بتلمي شعرك بتوكة على ورا وتلبسي بيجاما حلوة ومهندمة، وتغيري لبس الطبخ قبل ما يوصل ويكون بيتك متروق، وما تحاوليش تغيري ديكورات البيت من غير ما تستأذنيه، لأنه بيحب يشوف كل حاجة زي ما هيا، عشان التفاصيل الصغيرة بتزعجه ويحب يشوف الحاجة في مكانها.

وواصلت ياسمين عز: الرجل الحسي ده ألطف نوع، هتلاقيه دايمًا يقول لك أنا حاسس أنا قلبي مقبوض منك، وحاسس قلبي مش مطمن، فده هتحسسيه بمشاعر طول الوقت.

ياسمين عز تجيب على أسئلة متابعيها
ومن ناحية أخرى، ردت ياسمين عز على بعض أسئلة جمهورها كالآتي: مطلق من سنتين وأهلي رشحولي واحدة معرفعهاش بس مات لها تلات أزواج قبل كده وأنا قلبي مش مرتاح.

وردت ياسمين عز: كله إلا قلبك يا أستاذ أحمد واه طبعًا بننهي عن التشاؤم وأهم حاجة راحتك، واستفت قلبك واسأل أهل التخصص.

وأكملت ياسمين عز: واحدة بتسألني عاوزة جوزي يجري ورايا، وبقول لها بسيطة يا مدام، تاخدي موبايله وتجري وهو هيجري وراكي.

كما تحدثت ياسمين عز عن رسالة متابع جاء فيها: هل صحيح الست المتجوزة تصحى تبوس راس جوزها؟، لترد: صحيح خصوصا لو متجوزة مصري فرعون أصيل.