الإنفلونسر فرح هريدي تهاجم تامر حسني: طلعت كومبارس في فيلمه الجديد بدون علمي ومخدتش جنيه

كشفت الإنفلونسر فرح هريدي مفاجأة بشأن فيلم تاج لـ تامر حسني، والذي يعرض في السينمات حاليًا بالتزامن مع حلول عيد الأضحى، مشيرةً إلى أنها ظهرت بالعمل دون علمها ودون أجر.

وقالت فرح هريدي في مقطع فيديو عبر حسابها على فيسبوك: أنا طلعت كومبارس في فيلم تامر حسني الجديد بس محدش قال لي، واللي حصل أن القائمين على الفيلم كلموني وقالوا لي إن تامر حسني بيعمل فيلم جديد وعايز يعمل معايا ومع كذا انفلونسر محتوى مقابل إننا هنعمل معاه فيديوهات على حساباتنا بمواقع التواصل الاجتماعي.

وواصلت فرح هريدي: قالوا لي مفيش فلوس هو يوم بالحب وتامر نفسه مش هياخد فلوس على اليوم دا، وقالوا هيكون فيه 15 شخص بس ومع الأسف كل دا كان أي كلام، ولقيت ناس كتير وكنت أنا وباقي الانفلونسرز واقفين في النص ووقفونا وبدأوا يصوروا واتضايقنا وقولنا عادي هنخلص عشان نبدأ بعدها نصور الفيديوهات الخاصة بينا.

وأضافت فرح هريدي: قعدنا ساعتين في التصوير ولقينا فجأة تامر حسني وقالوا لنا يلا اتصوروا معاه بسرعة عشان نمشي وكل واحد اتصور صورة واحدة، وأنا مكنتش عارفة إني هطلع في الفيلم ومخدتش جنيه وكلنا مكناش راضين عن اللي بيحصل.

فيلم تاج
فيلم تاج يضم العديد من الفنانين، أبرزهم: ساندي، هالة فاخر، دينا الشربيني، عمرو عبد الجليل، ومن تأليف تامر حسني، وإخراج سارة وفيق.