”رحل صيدلي الغلابة” الدكتور محمد نايل : لو معاك 10 جنيه والروشته ب 300 تدفع 10 وتاخد العلاج

تاجر مع الله تربح تجارتك

إستيقظنا ذات صباح علي خبر أحزننا جميعا وهو وفاه الدكتور محمد نايل صيدلي الغلابه كما كان يطلق عليه من جميع من تعامل معه

رجل تاجر مع الله فربحت تجارته

رحل صيدلي الغلابة... ادعوا له بالرحمة والمفغره

الدكتور محمد نايل , عنده 3 صيدليات

لو معاك 10 جنيه والروشته ب 300 تدفع العشرة وتاخد العلاج

وقبل ما تمشي يقولك لو إحتجت حاجه رن عليه في أي وقت

لو فقيرة محتاجه تجهز بنتها يبعتها تختار الأجهزة من محل فلان وفلان يقولها الحساب مدفوع وتؤمري بأي حاجه تانيه

لو مزنوق في قرشين تقدر تميل عليه وتطلبهم وإنت عارف إنه مش هيكسفك

أيتام كتير كان متكفل بهم وأرامل وفقراء وبيته مفتوح للجميع

كان الممول الغير معروف لمسابقة حفظ القرآن الكريم بالقرية

كان يقابل الفقير اللي بيشتري علاج بإبتسامة ويحضر له الدواء و يقول له لك خصم 50٪ إجباري، ويبدأ في حلقة من الهزار لكي يطفئ الإحراج عن صاحب الهم .

كنت تروح له عايز علاج ضروري الساعه 3 بالليل وتتأسف بسبب إن الوقت متاخر يرد عليك بإبتسامة قائلا: آسف ليه ده شغلي ربنا سخرني علشان أكون كده في أي وقت أنا تحت أمرك.

50% من الأدوية مخصصة للفقراء والمحتاجين

و لو الروشته فيها محاليل يقولك ويسألك : فيه محاليل مين هيركب للمريضة المحاليل ؟ فتصمت فيتابع قائلا : هاجي معاك علشان أشرف علي تركيبها، ومكنش بس بيركبها ويمشي بل كان يظل في المنزل حتى انتهاء المحلول بالكامل ويرفض الحصول علي ثمن الروشتة.

قال مرة لارملة فقيرة علم ان لها إبنتان تعالي في المكان الفلاني ولما راحت خدها لمحل تجهيز عرائس وأشترى لها كل مايلزم لإبنتيها كما تكفل بمصاريف النقل ثم رحل وتركها بعد ان أزاح عنها هم تكاليف تجهيز البنتين

خرجت قريته شبلنجة التابعة لمركز بنها كاملة والقرى المجاورة لها في جنازة لم تشهد القرية مثيلا لها بعد ان وصل الجثمان إلى قبره والمشيعون من كثرتهم لازالوا امام المسجد

هذه هي الامثلة التي يجب أن يراها أطفالنا وشبابنا .

اللهم اغفر له وأرحمه وتجاوز عن سيئاته وأجعل قبره روضة من رياض الجنة