طريقة عمل العيش البطاطى(الفلاحي)على البوتوجاز

إثنين كيلو دقيق عادى من عند العطار ( دقيق قمح )
كوباية دقيق ذرة منخولة
كوباية ردة منخولة
نص معلقة صغيرة ملح
حتة خميرة قد عين الجمل
معلقة سكر
نص كوباية مية دافية
مية دافية للعجن
- اول حاجة نحط معلقة سكر مع الخميرة و ندعكهم كويس و نضيف عليهم نص كوباية مية دافية و نغطيه ونسيبها تخمر كويس
- ننخل الدقيق مع الردة مع دقيق الذرة على بعض و نحط عليهم نص معلقة ملح صغيرة
- نحط الدقيق المنخول فى طبق بلاستيك واسع و نحط الخميرة على الدقيق مع شوية مية دافية ونحركها بأطراف الصوابع لغاية العجينة ما تلم و تضغطى عليها بظهر إيدك وتلمى العجين وتضغطى كانك بتديها بالبوكس كدة و لو إحتاجت مية حطى ليها بالراحة كدة حبة حبة لغاية ما تتكون عجينة متماسكة وتلاقى العجين ساب فى ايدك كدة زى الملبن وحلوة و تغطيها بقماشة تقيلة و تسيبيها فى مكان دافى لغاية ما تخمر ويرتفع
- تجيبى صنية واسعة ونفرشها بالردة ونبدا فى تقريص العجين كور صغيرة و تغطيه بالقماشة
- تولعى فرن البوتوجاز يسخن على ماتفردى الكور و تبططيها وتفرديها بالنشابة زى الرقاق كدة ولو عندك ماكينة القدوسية هتريحك قوووى وتقطعية نصيين بالسكينة بالطول ولو الجريل بتاعك صغير قطعى على اربعة عادى
- تشغلى البوتوجاز وتحطى الجريل يسخن قوووى و تحطى الرغيف على الجريل و أول مايبدا يستوى تشلية وتحطية فى الفرن على الشبكة على اعلى درجة حرارة تحت الشواية علشان يقب كدة ويطقطق ووشه يحمر..
والف هنا وشفااااا.