تعرف على طريقة عمل البط بالبرتقال

التتبيلة ..

????كوب عصير بصل
????نص كوب عصير طماطم
????نص كوب عصير برتقال
????نص معلقه صغيره زعتر
????معلقة صغيرة بابريكا
????معلقة صغيرة فلفل اسود
????معلقة صغيرة سكر
????معلقة صغيرة ملح

هندوب كل المكونات دى مع بعض كويس جدا ونوزعها على كل أجزاء البط بره وجوه ونحطها جوه الكيس الحرارى بالتتبيلة ونحضر الخلطة اللى هنحشيها بيها

#خلطةالحشو ..

????بصل قطع كبيرة
????بصل اخضر حلقات
????طماطم قطع كبيرة
????برتقاله قطع كبيرة
????كرفس بلدى قطع
????رشة روز مارى
????ملح وفلفل

بخلط كل المكونات كويس جدا وبضغط عليهم بإيدى أثناء الخلط عشان انزل جزء من عصير البرتقال والطماطم والبصل يمتزجوا مع بعض ويعملوا ريحة عطرية قوية

هانحشى البط بالخلطه كويس ونضغطها جوه البطن عشان البطه تبقى مكبوسة ومليانه وشكلها يبقى منفوخ وحلو فى التقديم

نقفل الكيس ونسيب البطه جواه بالتتبيلة والحشوة ساعتين على الأقل فى التلاجة
بعد مرور الساعتين هاندخلها فرن ساخن مسبقاً على أعلى درجة حرارة لمدة نص ساعة وبعدين نقلل الحرارة ل200 درجة
بتاخد وقت من ساعه ونص لساعتين حسب الوزن

لو مافيش كيس حرارى بعمل كل الخطوات السابقة دى فى صينية وبضيف معاها نص كوب ميه فى الأرضية واضيف فيها شوية منكهات وبغطيها بورقة زبده وطبقتين من الفويل عشان ما تتحرقش من بره

بعد ما تستوي تماماً هاجهز الصوص (الجلاس) اللى هادهن بيه الوش

????????صوص البرتقال ..????????

????اتنين معلقة كبيرة سمنة مع معلقة كبيرة زيت
????معلقة كبيرة صلصة طماطم معلبة
????معلقة كبيرة عسل أبيض
????نص كوب عصير برتقال
????ملح وفلفل ورشة قرفة خفيفه جدا

- هنحط السمنة والزيت على نار متوسطة ولما يسخنوا ننزل بمعلقة الصلصة نشوحها كويس
- بعدين ننزل بمعلقة العسل الابيض ونقلبهم دقيقتين
- بعدها ننزل بعصير البرتقال مع التقليب المستمر ونضيف الملح والفلفل ورشة القرفة ونسيبوا على نار متوسطة لغاية ما يتقل

هاندهن بيه البط كويس من كل مكان وندخلها تحت الشواية ونقلبها كل شوية لمدة 10 دقايق تقريباً لغاية ماتاخود اللون الذهبي الجميل

وخلاص كده تقدروا تنقضوا عليها بلا رحمة وبألف صحة وهنا.